الأحد، 29 أغسطس، 2010

       الصور بتتكلم.....لا تعليق

الموضوع ده عبارة عن صور شوفتها في موقع ،قلت أخدها واكتب موضوع عليها، وبجد والله قعدت أدور علي كلام أكتبه كموضوع والله مش لاقية قولت أعرض الصور المؤسفة جداً عن حال العرب تجاه اهلنا واخواننا في غزة اللي بجد مبينه أد إيه القوب ماتت واتحجرت بقت زي الحجر لا والله حتي الحجارة زي ماقال الله " وإن من الحجارة لما يتفجر منه الأنهار وإن منها لما يشقق فيخرج منه الماء وإن منها لما يهبط من خشية الله" والله اَية بتوجع أوي،، الضماير والله ماتت وبعزي كل العرب اللي كل واحد منهم خايف علي كرسيه وبقولهم ( البقاء لله)،كله بيندد وبيدين وبس والدنيا كلها كلام في كلام ولحد يوم الدين هيفضلوا يتكلموا وبس ،،ويعقدوا مؤتمرات قمة فاشلة من أول لحظة وبس،،، وبالروح بالدم نفديكي ياغزة،،،وأغاني تتعمل وفي القلب يافسلطين ومنصورة ياغزة،،، ياسلام  علي الخطوات الايجابية دي وبعدين !!!!!!!! شايفين أشلاء أطفال ونساء وشيوخ وشباب شهداء،وتعذيب ودمار،ولا أكل، ولا شرب ، ولا كهرباء ولا حتي علاج ، ينامو في البرد ،،، نفسية محطمة ، والله حاجة فعلاً تقطع القلب ،ومع ذلك كله مغمض عينه وسادد ودانه ، وطبعا الصمت العربي ده هو اللي مقوي الأعداء علينا،وأكيد طبعا بالإضافة للأسلحة الجامدة اللي عندهم لكن الصمت العربي تقريباً أقوي سلاح ،مهوكله مكبر دماغه ولاحد بيعمل حاجة ولا بيتحرك ولا يقف وقفة راجل ،خلاص يعملوا اللي هما عاوزينه بقي،والله إن انا مكسوفة جدا وبسأل نفسي سؤال ،لو أتيحت ليا الفرصة وقابلت حد فلسطيني والله حاسة ان هتكسف أوريله وشي ، لإني معرفتش أعمله حاجة والله مش متخيله،والصوردي اللي هتتعرض كاريكاتيرية ، هي صور أه بس فعلا بتتكلم وبتعبر عن اللي اللسان يعجز انه يقوله ، ودي الصور:
 أولها صورة فعلا يستحقها كل مسؤل عربي مكبر دماغه وهو قادر يعمل حاجة                            

ودي صورة واقع حكام العرب


إدي ظهرك لغزة



ودي صورة الحكام العرب وقت الشدة


والصورة دي بقي لا أسمع لا أري لا أتكلم


ودي صورة الشهييد العربي ( الضمير)

وفي الاُخر معنديش أي حاجة أقولها غير حسبنا الله ونعم الوكيل في كل مسؤل عربي سكت وكبر دماغة من ناحية غزة وأهلها وهو قادر يعمل حاجة أو حاجاااات كتييير.

الأربعاء، 28 يوليو، 2010

  
        حجاب القرن 21        

حتي الحجاب بقي فيه موضه،أشكال وألوان،،، سبحان الله ،وكل يوم تطلع لفة جديدة وبشكل جديد،،، سبحان الله.
والله أنا شفت في إحدي البرامج واحدة طالعة تعلم البنات لفة جديدة وقالت بنفس اللفظ ( أنا النهاردة جاية أعلمكم لفة طرحة جديدة ومختلفة يعني نقدر نقول عليها تقليعة)
والله والله والله اني استفزيت من الكلمة لأنها كلمة مستفزة جدا ،،،تقليعة!!! وفي الحجاب!!! حتي الحجاب بقي فيه تقليعة! سبحان الله العظيم ، وانا لله وانا إليه راجعون. طيب سؤال وبجد عاوزة له اجابة؟
طبعا إن الله جميل يحب الجمال بلا شك، واكيد لازم نكون في مظهر كويس، كويس لكن مايكونش ملفت بالشكل الفظيع اللي احنا بنشوفه ده.
بالله عليكم  حد يقولي ايه الحجاب؟
الحجاب هو مايستر،،، ياتري حجاب القرن 21 ده بيستر؟ لفة الطرحة الكاجوال اللي بتبين الرقبة والاذن إن لم يكن شوية من الشعر كمان ( الأصة).
ده طبعا غير البنطلونات الضيقة جدا ،،، وال body ،تلاقي حجاب شاذ جدا وغريب ،،، بنطلون ضيق جدا جدا مع طرحة،، سبحان الله العظيم.
هو ده الحجاب اللي ربنا أمرنا بيه ، اللي لا يصف، ولا يشف، ولا يكون زينة في نفسه ، ولا يكون لباس شهرة، وطبعا ماشاء الله ما أكثر النوع ده من الملابس ، والاقبال عليه ماشاء الله .
وقلما لو لقينا اللبس الواسع،، أنا شخصيا بعاني من المشكلة دي، كله body وجينز، والله المستعان .
هسأل سؤال وكل واحدة ترد علي نفسها ، ليه بنقلد كل حاجة من غير مانفكر هي هترضي ربنا ولا لأ؟ ده اذا طبعا كنا حريصين علي رضا الله .
ممكن نقول شكله حلو، نرد ونقول وربنا ، هو جميل وعاجبك وعاجب الناس بس مش عاجب ربنا ، يبقي ايه الحل؟ طبعا اننا نستبدله بما يرضي الله.
ممكن نقول إنه مناسب مع الحر، نرد ونقول ان الله تعالي يقول ( قل نار جهنم أشد حرا لو كانوا يفقهون) .
ممكن نقول علشان يبقي شكلي حلو يمكن أعجب،، هنقول رسولنا صلي الله عليه وسلم قال : (إن العبد ليحرم الرزق بالذنب يصيبه) . فالرزق عمره ما ييجي بمعصية الله.
وقال الله تعالي( ومن يتق الله يجعل له مخرجا ويرزقه من حيث لا يحتسب) . أنا بلغت ووضحت اللهم فاشهد.
وصلي اللهم علي سيدنا محمد وعلي اَله وصحبه وسلم.

الجمعة، 23 يوليو، 2010

حصريا علي الحياة
ودي كلمة قناة الحياة وقنوات كتيييييييييرعلشان نتابع المسلسلات ،،،وطبعا ناس كتير اوي بتابع، ويكسلوا عن صلاة التراويح ويقولوا هنصلي في البيت ،وده طبعا علشان يتفرجوا علي البرامج والمسلسلات أولاًَ وبعدين يصلوا حين ميسرة ، وطبعاهيلاقوا مسلسل ورا مسلسل ، برنامج ورا برنامج، وفي النهاية جه وقت السحور، الحمد لله اتسحروا ، الفجر أذن ،الحمد لله صلوا، يلا بقي يناموا، ويصحوا متأخر لإنهم سهرانين ، وست البيت تغرق في شغل البيت وتجهيز الفطار، ومنهم اللي يروح الشغل أو الجامعة ،ويرجعوا تعبانين ويناموا شوية ويصحوا علي الفطار، خلاص ضاع القراَن، وضاع القيام، وضاع شهر رمضان،،، ياالله شهر رمضان يضيع !!! الشهراللي المفروض اننا بنزود فيه طاقتنا الايمانية مش نضيعها!!!
سبحان الله العظيم،محدش سأل اشمعني رمضان بالذات اللي بيكتروا فيه مع ان طول السنة عدد المسلسلات عادي؟ أقول لكم لانهم عارفين ان ده شهر الطاعات فبيحاولوا يفتنونا بكمية المسلسلات دي، ومننا اللي بيستسلم ومننا اللي بيقاوم وبيقضي الشهر بما يرضي الله،،،والله كلها فتن،ده كل سنة عدد المسلسلات بيزيد عن اللي قبله، لاحظتم؟ اعقلوا الموضوع ياجماعة بالله عليكم.
أنا برجوكم نحاول كلنا نستغل الشهر ده في كل خير، وكل نَفَس فيه يبقي لله وبس وكل نظرة فيه تبقي للمصحف ولكل حاجة ترضي الله زي مثلا برنامج ديني وما أحلي البرامج دي والله خاصة في رمضان ، تعالوا نجرب نبدل، مع ان التجربة دي من المفروض انها متبقاش تجربة بالعكس تكون واجب وفرض علي كل واحد!!!!ايه رأيكم؟ اللي كان بيتفرج علي المسلسلات ومتابع أوي يجرب ميتفرجش السنة دي ويلاحظ الفرق،،، أنا بخاطب نفسي معاكم، يلا نعاهد ربنا أولاُ وبعدين نعاهد أنفسنا اننا هنقضي رمضان في طاعة الله وبس، وليكن شعاركل واحد فينا (لن يسبقني الي الله أحد) ،ونختم القراَن أكتر من ختمة ونتنافس في طاعة الله (وفي ذلك فليتنافس المتنافسون).
يارب يارب أكون قدرت أوصل لكم اد ايه الشهر ده غالي اوي واد ايه لازم نستغله صح اوي تعالوا ندعي كلنا الدعاء ده وربنا يستجيب إن شاء (اللهم بلغنا رمضان ايمانا واحتسابا) اللهم اَميييييييييينن ، وصلي اللهم وسلم وبارك علي سيدنا محمد وعلي اَله وصحبه وسلم.